Uşaq bağçasında bayram şənliyi keçirilib – Sabirabad-FOTOLAR

Sabirabad şəhərində yerləşən 2 saylı uşaq bağçasında Azərbaycan xalqının milli adət ənənələrini özündə birləşdirən xalqımızın qədim bayramı olan Novruz Bayramı qeyd olunub.
Tədbirin açılışında baxçanın müdiri Kəmalə Babayeva çıxış edərək uşaqları və bağçanın kollektivini bayram münasibətilə təbrik edib, onlara əmin-amanlıq, ruzi-bərəkət və firəvan həyat arzulayıb. Sonra bayram libaslarında olan uşaqların ifasında maraqlı ədəbi – musiqili proqram nümayiş olunub. Novruza, baharın şəninə şeirlər, mahnılar, rəqslər ifa edilib, səhnəciklər göstərilib. Şənliyin ən maraqlı anları isə azyaşlıların “Novruz bayramı” na , yazın və baharın gəlişinə, keçəl ilə kosaya aid şeirlər söyləməsi olub. Tədbirdə uşaqların rəngarəng rəqsləri maraqla izlənib. Şənliyə Novruzun simvolları olan Bahar qız, Kosa və Keçəl də təşrif buyurub. Onların gəlişi isə uşaqların sevincini daha da artırıb. Bu bayramda uşaqlar şənlənməklə yanaşı Novruz adətləri ilə yaxından tanış oldular. Novruz şənliyi Bayram tonqalı ətrafında uşaqların şən rəqslərinin ahəngi ilə yekunlaşdı. Qeyd edək ki, rayonun nümunəvi baxçalarından biri olan 2 saylı Sabirabad şəhər baxçasında 4 qrup olmaqla 80 uşaq tərbiyə alır..