Bu abidələrin araşdırılmasına ehtiyac var-FOTOLAR

Salyanın qədim yaşayış massivi olan Babazanlı qəsəbəsində bir-birinə bağlı olduğu deyilən tikililər var ki, illərdir baxımsız qalıb. Sakinlərin dediyinə görə bu tikililər tarixi abidə olsa da haqqında məlumat çox azdır.
Abidənin hündürlüyü 5 metr, divarının qalınlığı təxminən 80 smdir. Sakinlər deyir ki, abidənin hansı məqsədlər üçün istifadə olunmasına dair fərziyyələr də çoxdur. Burada yaşayanların sözlərinə görə, Babazanlı ərazisində 17, 18 və 19-cu əsrlərə aid quyular, ovdanlar, yaşayış yerləri olub və bu gün də mövcuddur. Bu tikililər də çox güman həmin abidə-ansamblına aiddir. İki tikilidən biri isə qəsəbə sakini Ağakərim Zeynalovun həyətyanı sahəsində qorunub saxlanılır. Abidənin ətrafında olan böyük quyunun üzərində 4 ədəd kiçik günbəz şimal, cənub, şərq, qərb cəhətlərini simvolizə edildiyini deyirlər. Hər iki tarixi abidənin giriş qapısı şərq üslubunda inşa olunub. O da iddia olunur ki, abidələr arasında yeraltı yol mövcud olub və bu tunel Kür çayını keçməklə Salyan şəhərinə qədər uzanıb.Tarixçilərin sözlərinə görə Babazanlı ərazisində araşdırılmayan bu cür tarixi abidələr çoxdur. Bu da ərazinin qədimliyinin göstəricisidir. Onlar hesab edir ki, bu cür abidələr tapılmalı və tədqiq edilməlidir. Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətini Salyan Reional İdarəsi ilə əlaqə saxladıq. İdarədən şifahi olaraq bildirildi ki, artıq tikililərdən nümunələr götürülüb və araşdırılması üçün işlərə başlanılıb.