Avqustun 4 -də Azərbaycanın ərazi bütövlüyü uğrunda I Qarabağ müharibəsi zamanı Ağdərə rayonun Çıldıran kəndi uğrunda gedən döyüşlərdə itkin düşmüş Sadıqov Mahir İkram oğlunun adının əbədiləşdirilməsi məqsədilə onun xatirəsinə Hacıqabul rayonun Qarasu kəndində ucaldılmış abidə kompleksinin açılış mərasimi keçirilib.
Qarasu kəndinin dörd şəhidindən biri də Mahir İkram oğlu Sadıqovdur. O, 4 iyun 1971 – ci ildə Hacıqabul rayonun Qarasu kəndində anadan olub.1986 – cı ildə Qarasu kənd orta məktəbin 8 – ci sinifini bitirən Mahir elə həmin ildə sənədlərini Sumqayıt şəhərindəki 147 saylı peşə məktəbinə verib və avtoelektrik peşəsinə yiyələnib. 1989 – 1991 – ci illərdə sovet ordusunda həqiqi hərbi xidmət keçmiş Mahir vətənin ağır günlərində könüllü olaraq Əli Bayramlıya, indiki Şirvan şəhərinin Hərbi Komissarlığına gedərək cəbhəyə könüllü getməsi barədə müraciət edir.Döyüş bölgəsinə yollanan Mahir Sadıqov Ağcabədi və Tərtər rayonlarında qısa müddətdə hərbi təlim keçir. O, Ağdərə, Drambon döyüşlərində iştirak edir, 7 sentyabr 1992 – ci il tarixdə Ağdərə rayonun Çıldıran kəndi uğrunda gedən döyüş zamanı şəhidlik zirvəsinə uçalır. Artıq 32 ildir məzarı olmayan Şəhid Mahir Sadıqovu doğulduğu Qarasu kəndində xatirəsinə ucaldılmış abidə kompleksində ziyarət etmək mümkün olacaq… Açılış mərasimində şəhidin ailə üzvləri, yaxınları, rayon rəsmiləri, ictimaiyyət nümayəndələri, şəhid ailələri və qazilər iştirak edib. Tədbir Azərbaycan Respublikasının Dövlət Himninin səslənməsi ilə başlayıb. Ardınca Azərbaycanın ərazi bütövlüyü uğrunda canından, qanından keçən şəhidlərimizin əbədi xatirəsi bir dədiqəlik sükutla yad edilib. Daha sonra Şəhid Mahir Sadıqovun anası oğlunun xatirəsinə ucaldılmmış büstün açılışını edib. Mərasim iştirakçıları abidə kompleksinin önünə gül dəstələri düzüb, düşmən tapdağı altındakı torpaqlarımızın azad olunmasında qəhrəmanlıqlar göstərərək şəhidlik zirvəsinə ucalmış döyüşçülərin xatirəsini ehtiramla anıblar. Çıxış edən natiqlər Mahir kimi Vətən yolunda öz canını fəda edən gənclərimizin heç vaxt unudulmayacağını, onların qısa, amma çox şərəfli həyat yolunun bütün gənclərə nümunə olduğunu deyərək, şəhid Mahir Sadıqovun doğmalarına başsağlığı verib, onun xatirəsinin həmişə əziz tutulacağını söylədilər..
MUASİRMEDİA.AZ
Yaqub Mehdioğlu Hacıqabul r. Qarasu k.
