Biləsuvarda baş verən yanğın hadisəsi bir ailəni evsiz qoydu .. Biləsuvar rayonunun Bəydili kəndində yanğın hadisəsi bir ailəni evsiz qoydu. Beləki, 50 yaşlı Elşad Aydın oğlu Eyvazova məxsus fərdi yaşayış evində yanğın baş verib. Yanğın ailə başçılarının rayon bazarında olduğu vaxtda baş verib. Evdə həmin vaxt ailə üzvləri olmayıb. Evin yandığını qonşular görərək müvafiq qrumlara müraciət ediblər. Hadisə yerinə Biləsuvar rayon Yanğından Mühafizə Hissəsinin əməkdaşları və iki texnika cəlb olunsa da, yanğının güclü olması səbəbindən ümumi sahəsi 64 kvadratmetr olan bir mərtəbəli, 4 otaqlı ev tamamilə yanıb. İlkin ehtimallara görə yanğın internet modeminin qoşulduğu elektrik xəttində baş verib və yanılı surətdə qalmış cihaz alışaraq yanıb. Nəticədə yanğın böyüyərək evdəki yanar konstruksiyalara keçib. Qeyd edək ki, Eyvazovlar ailəsinin bir övladları ali təhsil aldığı, digər hərbiçi olduğu üçün onlar da evdə olmayıblar. Baş verən yanğın hadisə ilə bağlı müvafiq qrumların araşdırılması davam edir.
Yaqub Mehdioğlu Biləsuvar
