Salyanda bir qrup sakin yaşadıqları ərazidən keçən avtomagistraldan piyada zolağının olmamasından şikayətlənir. Söhbət Salyan şəhərinin 400 nəfərdən çox sakini olan RTS yaşayış massivindən, daha dəqiq desək 20 Yanvar küçəsindən gedir. Sakinlər deyir ki, yeni çəkilən avtoimagistral onlar üçün böyük təhlükə mənbəyinə çevrilib. Belə ki, yolda piyada zolaqlarının olmaması burada yaşayan sakinlərin gediş-gəlişi üçün çətinliklər yaradır. Sakinləri narahat edən əsas məsələlərdən biri də yaxınlıqdakı məktəblə bağlıdır. Onlar bildirir ki, məhz piyada zolağının olmaması səbəbindən dəfələrlə məktəblilər təhlükə ilə üz-üzə qalıblar. Belə ki, yolun yaşayış massivindən keçən hissəsində sürət həddi nişanı qoyulsa da sürücülərin çoxu buna əməl etmir. Sakinlər deyir ki, bir neçə həftə bundan əvvəl elə bu ərazidə yoldan keçən piyadanı avtomobil vurub. Nəticədə piyada yerindəcə keçinib. Belə faciələrin təkrar yaşanmaması söz mövzusudur. Qeyd edək ki, həmin yolun digər yaşayış massivlərində həm piyada zolaqları, həm də dayanacaqlar mövcuddur. Problemin çözülməsi ilə bağlı Salyan Rayon İcra Hakimiyyəti ilə əlaqə saxladıq. İcra Hakimiyyətindən şifahi olaraq bildirildi ki, sakinləri narahat edən problemin həlli istiqamətində aidiyyəti qurumlara müraciət ediləcək və məsələ tez bir zamanda öz həllini tapacaq.
MUASİRMEDİA.AZ
Yaqub Mehdioğlu Salyan
