Cəlilabad rayonunda ağır yol qəzası baş verib.Minik avtomobili idarəetməni itirərək körpüdən aşıb və çaya düşüb. Hadisə nəticəsində üç nəfər, Lerik rayon sakinləri 41 yaşlı Qafil Fikrət oğlu Əliyev və sərnişinlər 36 yaşlı Gülşən Qafarova, 67 yaşlı Kitabə Mirzəyeva müxtəlif dərəcəli xəsarətlər alıb. Qəzaya uğrayan avtomobildə olan şəxslər Bakıdan gələrək Biləsuvar – İmişli istiqamətinə gedirmiş. Qəza Cəlilabad rayonunun Uzuntəpə kəndindən Ələt-Astara magistralına çıxış üçün salınmış alternativ yolda qeydə alınıb. Belə ki, Lerik rayon sakininin idarə etdiyi “Mercedes-Benz” markalı avtomobil ilkin məlumata görə, qəfil qarşısına çıxan təsərrüfat atından yayınmaq istəyərkən idarəetməni itirib. Nəticədə nəqliyyat vasitəsi körpüdən aşıb və çaya düşüb. Maşında olan üç nəfər – sürücü və iki sərnişin xəsarət alıb. Xəsarətlə bağlı hər üç şəxs suda boğulmağa başlayıb. Yalnız sürücü son anda avtomobilin qapısını açmaqla sudan çıxıb və dərhal digər iki sərnişini də maşından çıxarıb. Qeyd edək ki, sözügedən alternativ yoldan o qədər də istifadə edilmədiyindən hadisə yerinə yaxın heç kimsə olmayıb. Sürücü ciddi yaralı olmasına baxmayaraq hər iki qadın sərnişini çayın kənarına çəkə bilib. Məhz bundan sonra onun müraciəti əsasında əraziyə Cəlilabad rayon Təcili Yardım Stansiyasının həkim birqadası və yerli dövlət avtomobil xidmətinin əməkdaşları gəlib. Qəzaya uğrayanlar dərhal ərazidən çıxarılaraq Cəlilabad Rayon Mərkəzi Xəstəxanasına çatdırılıb.Faktla bağlı araşdırma aparılır. Ekspertizanın rəyindən sonra hadisənin dəqiq səbəbləri məlum olacaq.
MUASİRMEDİA.AZ
Yaqub Mehdioğlu Cəlilabad
