“Vətən sağ olsun”,Şəhid Rahət İsayevin ömür yolu-FOTO,VİDEO

Şəhid Rahət İsayev  2000-ci il dekabrın 26-da Biləsuvar rayonunun Əliabad kəndində dünyaya göz açmışdı. Gülərüz, cəsur və qayğıkeş bir uşaq idi.
Ailəsinin fəxri, müəllimlərinin sevimlisi idi. 2007-2018-ci illərdə Malik Piriyev adına Əliabad kənd tam orta məktəbində təhsil aldı. Sabirabad Dövlət Kollecinə qəbul olunsa da, təhsilini qiyabi davam etdirmək qərarına gəldi və 2019-cu ildə Vətənin çağırışına cavab verərək hərbi xidmətə yollandı. Azərbaycan Silahlı Qüvvələrinin Göygöl rayonundakı ‘N’ saylı hərbi hissəsində xidmətə başladı. Kəşfiyyatçı atıcı kimi Vətənin keşiyində durdu. Subay idi. Rahət qorxmaz idi, mərd idi, ibadət edən, haqq yolunda addımlayan bir vətən oğluydu. 2020-ci il sentyabrın 27-də başlayan 44 günlük Vətən müharibəsində Rahət İsayev Xocavəndin azadlığı uğrunda gedən döyüşlərdə savaşa atıldı. Noyabrın 6-da qəhrəmancasına şəhid oldu. Noyabrın 18-də doğma torpağında – Biləsuvarda dəfn edildi.Valideynləri deyir: Rahət qorxmaz idi, haqqı sevərdi, zəifin yanında olar, heç vaxt geri çəkilməzdi. Hələ uşaqkən Lider TV əməkdaşları kəndə səfər zamanı ondan müsahibə də almışdılar – o günlərdə belə Vətən sevgisi aşıb daşırdı gözlərindən.Onun qəhrəmanlığı dövlət tərəfindən də yüksək qiymətləndirildi. Şəhid Rahət İsayev ölümündən sonra Azərbaycan Prezidenti İlham Əliyevin sərəncamlarına əsasən orden və medallarla təltif olundu.
Rahət İsayev öz ömrü ilə sübut etdi: Yaşamaq gözəldir, amma Vətəni yaşatmaq daha uca dəyərdir.

Allah Rəhmət Eləsin!