Zöhrab Axundov – Xatirələrdə Yaşayan Ömür-FOTO,VİDEO

 Bu gün Salyan rayonu daha bir tanınmış ziyalısını, nüfuzlu ictimai xadimini itirdi. Uzun illər məsul vəzifələrdə çalışmış Axundov Zöhrab Əlimirzə oğlu 75 yaşında vəfat edib.
Zöhrab Axundov 12 oktyabr 1950-ci ildə Salyan rayonunun Şorsulu kəndində dünyaya göz açmışdı. Orta təhsilini doğma kəndində başa vurduqdan sonra ali təhsil almaq məqsədilə paytaxt Bakıya yollanmış və təhsilini indiki Azərbaycan Dövlət Neft və Sənaye Universitetində davam etdirmişdi. Əmək fəaliyyətinə məşhur Neft Daşlarında başlayan Zöhrab müəllim peşəkar bilik və bacarığı sayəsində qısa zamanda etimad qazandı. Daha sonra yanacaq komitəsində müfəttiş, ardınca isə Salyan rayonunda yerləşən Neft Bazasında rəhbər vəzifəsində çalışaraq neft sənayesinin inkişafına öz töhfəsini verdi. Mərhum son illərdə qara ciyər sirrozundan əziyyət çəkirdi. Təəssüf ki, uzun sürən xəstəlik bu gün – 29 iyun 2025-ci il tarixində onu bizlərdən aldı. Zöhrab Axundov doğulduğu kəndin torpağına – Şorsulu qəbiristanlığında dəfn edildi. Zöhrab müəllimi tanıyanlar onu daim vüqarlı, əməksevər, ailəcanlı və mərd bir insan kimi xatırlayacaqlar. Onun ömrü sadəcə şəxsi nailiyyətlərlə deyil, həm də xalqa, vətənə göstərilən sədaqətli xidmətlərlə yadda qaldı.

Allah rəhmət eləsin. Məkanı cənnət, ruhu şad olsun!