İmişli rayonunun Yalavac kənd sakini, 33 yaşlı Şəbnəm Kərimova Vaqif qızı Sabirabad doğum evində doğuşdan sonra ölüb.
Yeni doğulan kişi cinsli uşaq isə sağ qalıb. Qeyd edək ki, ana üçüncü övladının doğuşu zamanı həyatını itirib. Məsələ ilə bağlı TƏBİB – dən bildirilib ki, 1992-ci il təvəllüdlü hamilə qadın 7 iyul saat 18 radələrində İmişli Rayon Mərkəzi Xəstəxanasından Sabirabad Rayon Mərkəzi Xəstəxanasının nəzdində olan Perinatal Mərkəzə təxliyə olunub. Hamiləliyin patologiyası şöbəsinə yerləşdirilən pasiyentə 39-40 həftə hamiləlik, baş gəlişi diaqnozları təyin edilib və zəruri tibbi xidmətlər göstərilib. 8 iyul saat 13:50 radələrində doğuşa alınan şəxsin boyu 52 sm, çəkisi 4 kq 200 qr, cinsi oğlan olan körpə dünyaya gəlib. Müalicəsi davam etdirilən, vəziyyəti stabil olan zahı qadında profuz qanaxma başlaması qeydə alınıb və aparılan bütün reanimasiya tədbirlərinə baxmayaraq saat 18 radələrində ananın ölüm faktı qeydə alınıb. Meyit Sabirabad məhkəmə tibbi ekspertiza və pataloji anatomiya birliyində müayinə edildikdən sonra ailəsinə təhvil verilib. Ölümün səbəbləri ekspertizanın rəyindən sonra aydınlıq gətiriləcək. Faktla bağlı hüquq-mühafizə orqanları tərəfindən araşdırma aparılır.
MUASİRMEDİA.AZ
YAQUB MEHDİ OĞLU
