Yeni Azərbaycan Partiyasının fəal üzvlərindən biri olan Cəbiyev Daşqın Elçin oğlu Azərbaycan Dövlət Memarlıq və İnşaat Universitetini bitirdikdən sonra həmin ali təhsil müəssisəsində ixtisasartırma təhsili ilə elmi biliklərini daha da zənginləşdirib. Öz savadına və bacarığına güvənən Daşqın Cəbiyev 2017-ci ildən etibarən Azərbaycan Dövlət Meliorasiya və Su Təsərrüfatı ASC – də, indiki Azərbaycan Dövlət Su Ehtiyatları Agentliyinin Regional Su Meliorasiya Xidmətinin Baş Mil-Muğan Kollektorunun İstismarı İdarəsində çalışır. İşinə məsuliyyətlə yanaşan bu gənc, rəhbərlik tərəfindən verilən tapşırıqları vaxtında və yüksək keyfiyyətlə yerinə yetirməklə həm rəhbərliyin, həm də üzvü olduğu partiya nümayəndəliyinin dərin rəğbətini qazanıb. Onun Prezident İlham Əliyevə ünvanladığı təbrik və təşəkkür məktubları Kütləvi İnformasiya Vasitələrində də dərc olunub və geniş oxucu auditoriyası tərəfindən rəğbətlə qarşılanıb. Əslən Salyan rayonunun Şorsulu kəndindən olan Daşqın Cəbiyevə gələcək fəaliyyətində uğurlar, şəxsi və peşəkar həyatında davamlı yüksəliş arzulayırıq.
YAQUB MEHDİ OĞLU
