Ermənistanın Baş naziri Nikol Paşinyanın sonuncu mətbuat konfransında 33 il sonra Kollektiv Təhlükəsizlik Müqaviləsi Təşkilatından (KTMT) çıxmaqla bağlı sözləri Rusiyada birmənalı qarşılanmayıb. Baş nazir paralel olaraq Şanxay Əməkdaşlıq Təşkilatına (ŞƏT) üzv olmaq üçün müraciət etdiklərini açıqlayıb və Avropa İttifaqına (Aİ) üzvlüklə bağlı da müsbət fikirlər səsləndirib.
Paşinyan Ermənistanın ehtiyacı olduğu anda KTMT-dən lazımi dəstəyi görmədiyini bildirib. Bu məsələdə Moskvada müzakirələrə səbəb olub. Artıq Kemlə yaxın şəxslər və erməni siyasətçilər İrəvanın Rusiyadan uzaqlaşması ilə bağlı təhlükəli proqnozlar səsləndirməyə başlayıblar.
Paşinyanın eyni vaxtda KTMT-dən uzaqlaşıb ŞƏT və Aİ kimi fərqli qütblərə yaxınlaşmaq istəyi Ermənistanın xarici siyasətində hansı riskləri yaradar? Xüsusilə Rusiya ilə münasibətlər fonunda bu, regiondakı proseslər necə təsir edəcək?
Politoloq Turab Rzayev deyib ki, bu, Ermənistan rəhbərinin uzunmüddətli planıdır:
“Paşinyan hakimiyyətə gəldiyi dövrdən, hətta keçmiş prezident Serj Sərkisyanla hakimiyyət uğrunda mübarizə apardığı mitinqlərdən etibarən əsas hədəfini bəyan edib: Ermənistanın Rusiyadan uzaqlaşaraq Avropaya yaxınlaşması, Qərb ailəsinin üzvü olması. Bu məqsədin reallaşması üçün Ermənistanın KTMT-dən, Avrasiya İqtisadi İttifaqından (Aİİ) və Gömrük İttifaqından çıxmasını təklif edir. Əvəzində, NATO ilə daha yaxın əlaqələr qurmağı, həmçinin Ermənistanın Aİ-yə üzvlük namizədliyini irəlilətməyi nəzərdə tutur. Artıq bu istiqamətdə Avropa rəsmiləri ilə bir sıra görüşlər keçirilib”.
Turab Rzayev
Politoloq qeyd edib ki, Paşinyan hazırda KTMT-dən çıxmağı planlaşdırır:
“Çünki bu təşkilat Rusiyanın hərbi birliyi olaraq fəaliyyət göstərir. Ona görə də, böyük ehtimalla, Paşinyan KTMT-dən çıxmaq üçün müxtəlif yollar axtarır. İndiyə qədər Ermənistan faktiki olaraq bu təşkilatda iştirakını dayandırmışdı. Paşinyan düşünür ki, KTMT-dən çıxmaq Rusiyanı ciddi şəkildə qəzəbləndirə bilər. Bunun əvəzinə, ŞƏT-ə daxil olaraq həm Rusiya, həm də Qərb ilə münasibətləri normal saxlamağa çalışır. O baxımdan, baş nazir əslində burada bir hiylə işlədir. Digər tərəfdən, gələcəkdə Avropa İttifaqı ilə münasibətlər yüksək səviyyədə inkişaf edərsə, ŞƏT-dən də uzaqlaşa və bu təşkilatla əlaqələrdə daha az aktiv ola bilər”.
Qeyd edək ki, Ermənistan 1992-ci ildə KTMT yarandığı gündən təşkilata üzvdür.
MUASİRMEDİA.AZ
