Jurnalistlər günü Salyan ASAN Xidmət Mərkəzində əlamətdar bir tədbir təşkil olunub

Azərbaycan milli mətbuatının 150 illik yubileyi münasibətilə Salyan ASAN Xidmət Mərkəzində əlamətdar bir tədbir təşkil olunub. Tədbir çərçivəsində ASAN Xidmət Könüllüləri ilə bir qrup media nümayəndələrinin dəyirmi masa arxasında görüşü keçirilib.
Görüş zamanı media nümayəndələri gənc könüllüləri maraqlandıran sualları cavablandırıb, jurnalistika sahəsindəki təcrübələrini bölüşüblər. Fikir mübadiləsi şəraitində keçən görüşdə milli mətbuatın tarixi, müasir jurnalistikanın çağırışları, informasiya müharibələri və medianın cəmiyyətdə rolu kimi mühüm məsələlər ətrafında geniş müzakirələr aparılıb. Könüllülər görüşü yüksək qiymətləndirərək, belə təşəbbüslərin onların bilik və dünyagörüşlərinin genişlənməsinə böyük töhfə verdiyini vurğulayıblar. Tədbirin sonunda iştirakçılar milli mətbuatın inkişafında əməyi olan bütün jurnalistləri təbrik edərək, gələcək fəaliyyətlərində onlara uğurlar arzulayıblar.