Ukrayna kəşfiyyatı Rusiyanın mühüm silah və texnika istehsalı həcmlərinə dair məlumatları açıqlayıb

Təyyarə, tank, zirehli texnika, artilleriya sistemi və raketləri əhatə edən rəqəmlər DIU rəis müavini Vadim Skibitski tərəfindən “Ukrinform”a açıqlanıb.

Skibitskiyə görə, Rusiyanın 2025-ci il istehsal planları bunları əhatə edir:

Aviasiya: 57 təyyarə – “Su-57”, “Su-35” və “Su-30” qırıcı təyyarələri ilə “Su-34” bombardmançı təyyarələri.

Zirehli texnika: Təxminən 250 yeni T-90M tankı və yeni istehsal olunmuş BMP-3 və BTR-82A daxil olmaqla, təxminən 1.100 zirehli texnika.

Artilleriya sistemləri: Müxtəlif tipli 365 yeni qurğu.

Uzaqmənzilli raketlər: Hər növdən təxminən 2.500 ədəd.

“Defense Express” tərəfindən yayımlanan xəbərə görə, DIU Rusiyanın 2024-cü ildə ayda 130-150, ildə isə 1.800-ə qədər uzaqmənzilli raket istehsal etdiyini təxmin edirdi. Bildirilən rəqəmlərin yalnız yeni istehsal olunan avadanlıqları əhatə etdiyi, köhnə və ya zədələnmiş sistemlərin təmirini, modernləşdirilməsini və ya bərpasını əhatə etmədiyi vurğulanır.

Rusiyanın planlarının digər bir istiqaməti isə döyüş meydanının genişmiqyaslı “dronlaşdırılması”dır. Məqsəd insansız sistemlərin döyüşdəki ümumi qüvvələrin 40%-nə çatdırılmasıdır. Bu baxımdan Rusiya bölmələri ənənəvi silahlardan imtina etməyəcək, sadəcə onları daha çox insansız sistemlə dəstəkləməyi hədəfləyir.

Xəbərə görə, Rusiya bu hədəfləri dəstəkləmək üçün Ukrayna sərhədindən 1.500-2.000 km məsafədə yeni müəssisələr tikərək, hərbi-sənaye kompleksini genişləndirir. Sərhədə daha yaxın yerləşən müəssisələr, “yəni müdafiə sənayesinin təxminən 25%-i” cəbhə xəttinə 250-500 km məsafədə qalmasına baxmayaraq köçürülmür.

Rusiya eyni zamanda Ukraynanın həll yollarını kopyalayaraq, öz arxa bölgələri üçün antidron sistemləri qurmağa çalışır. DIU-ya görə, rusların bu sentyabr ayında sınaqdan keçirilməsi planlaşdırılan 7 fərqli antidron sistemi mövcuddur.