Təyyar Nəsirlinin kitabının təqdimat mərasimi keçirilib-FOTO, VİDEO

Salyanda yazıçı-publisist Təyyar Nəsirlinin “Yaşamaq gözəldir, Vətən sağ olsun” kitabının təqdimat mərasimi keçirilib.
Şirvan-Salyan Regional Mədəniyyət İdarəsi və Salyan Rayon İcra Hakimiyyətinin birgə təşkilatçılığı ilə keçirilən tədbirdə rayon rəsmiləri, şəhid ailələri, müharibə iştirakçıları, ədəbiyyat adamları, ziyalılar və ictimaiyyət iştirak edib. Salyan Dövlət Kukla Teatrında düzənlənən tədbirdə ilk olaraq Ümummilli Lider Heydər Əliyevin və Azərbaycanın müstəqilliyi, ərazi bütövlüyü uğrunda canlarını qurban vermiş qəhrəman şəhidlərimizin əziz xatirəsi bir dəqiqəlik sükutla yad olunub, dövlət himni səsləndirilir. Çıxış edənlər “Tərəqqi” medallı jurnalist, Azərbaycan Jurnalistlər və Yazıçılar Birliklərinin üzvü, yazıçı-publisist Təyyar Nəsirlinin Salyan şəhidlərinə həsr etdiyi “Yaşamaq gözəldir, Vətən sağ olsun” kitabı haqqında fikirlərini söyləyiblər. Qeyd olunub ki, kitabda 44 günlük Vətən müharibəsi zamanı şəhid olmuş salyanlıların həyat hekayələri bədii üslubda oxucuya çatdırılır. Çıxışlarda şanlı Zəfərin Müzəffər Ali Baş Komandan, cənab Prezident İlham Əliyevin müdrik siyasəti, ali diplomatik bacarığı, bütöv bir xalqın birliyi və rəşadətli ordumuzun şücaəti sayəsində qazanıldığı vurğulanıb. Çıxış edən şəhid valideynləri kitabın müəllifinə təşəkkürlərini bildirib, ona yeni yaradıcılıq uğurları arzulayıblar.