Bu qərar xəstəliyin qarşısının alınması, epizootik vəziyyətin nəzarətdə saxlanılması və əhalinin sağlamlığının qorunması məqsədilə həyata keçirilmişdi.Bu müddət ərzində Salyan heyvan bazarı da fəaliyyətini dayandırmış, nəticədə satıcılar və alıcılar bazara gəlməkdə müəyyən çətinliklərlə üzləşmişdilər. Görülən profilaktik və təhlükəsizlik tədbirlərindən sonra isə vəziyyət stabilləşib.Artıq bu gündən etibarən Salyan heyvan bazarı yenidən fəaliyyətə başlayıb. Bazarın açılması üçün zəruri olan bütün texniki və sanitariya avadanlıqları quraşdırılıb, satıcılar və mal-qaranı bazara gətirən şəxslər üçün müvafiq şərait yaradılıb. Azərbaycan Qida Təhlükəsizliyi Agentliyi tərəfindən bazara baxış keçirilib və obyektin fəaliyyət üçün tam yararlı olduğu barədə rəsmi göstəriş verilib.Hazırda bazarda həm satıcılar, həm alıcılar, həm də mal-qaranı gətirənlər üçün rahat və təhlükəsiz mühit təmin olunub. Bazarın yenidən açılması yerli əhalinin gündəlik tələbatının ödənilməsinə, eyni zamanda regionda iqtisadi fəallığın canlanmasına mühüm töhfə verəcək. Bazarda heyvanların saxlanılması üçün yeni baryerlər quraşdırılıb. Təhlükəsizlik və sanitariya qaydalarına uyğun olaraq xırda buynuzlu heyvanların satışı ayrıca, iri buynuzlu heyvanların satışı isə ayrıca sahədə həyata keçirilir.
YAQUB MEHDİ OĞLU
