Ailələr dağılanda ən çox zərər görənlər nə ərdir, nə arvad. Ən çox zərəri bir küncdə sakitcə oturub göz yaşlarını içində udan uşaq görür.
O uşaq ki, nə baş verdiyini tam anlamasa da, sevdiyi iki insanın arasında parça-parça olur. Siz mübahisə edə bilərsiniz, aranızda fikir ayrılığı da ola bilər. Hətta ayrılmaq qərarına da gəlmiş ola bilərsiniz. Amma bir məsələ var ki, o uşaq sizə verilmiş bir imtahandır. O, sizin necə insan olduğunuzu göstərir. Onun qarşısındakı davranışınız sizin şəxsiyyətinizi, dəyərinizi, ata və ya ana olaraq kim olduğunuzu izah edir. Mediasiyaya gələn bir çox valideyn barışmaq üçün yox, haqlı olduğunu sübut etmək üçün gəlir. Amma biz onlara hər zaman bir şeyi deyirik: bu məsələdə haqlı yox, uşaq üçün faydalı olan yolu axtarın. Çünki məhkəmədə qazandığınız qərar uşağın ruhunda itirilmiş illərə çevrilə bilər. Uşağın yanında bir-birinizə “keçmiş həyat yoldaşım” kimi baxmayın. Onun üçün siz hələ də anasınız, atasınız. Onun tərbiyəsi, təhsili, sağlamlığı – ikinizin də borcudur. Aliment ödənişi bir düşmənə verilən cəza deyil, övladınıza göstərdiyiniz qayğının ifadəsidir. Uşağı qorumaq üçün ödəniş deyil, münasibət lazımdır. Barışıq sazişi kağızda yox, qəlbdə yazılmalıdır. Sizi bir-birinizdən ayrı sala biləcək qərarlar ola bilər, amma sizi övladınıza bağlayan bir məsuliyyət var – onu heç vaxt unutmayın. Bu məsuliyyətin adı sevgidir, anlayışdır, qarşılıqlı hörmətdir. Bəzən düşünürsünüz ki, “uşaq böyüyər, hər şeyi başa düşər”. Bəli, böyüyəcək. Amma o gün gələndə sizi necə xatırlayacaq? Barışığa razılıq verməyən bir ata kimi, görüş hüququnu pozan bir ana kimi, yoxsa onun xoşbəxtliyi üçün əlindən gələni edən iki insan kimi? Seçim sizindir. Amma unutmayın – uşağın gözündə qalib olmursunuz, ya əbədi sevilirsiniz, ya da unudulursunuz.
MUASİRMEDİA.AZ
Zaur Quliyev Mediator
