Bu gün Azərbaycan Milli Qəhrəmanı, igid zabit və əsl vətən oğlu Şükür Həmidovun doğum günüdür. Qubadlı rayonunun mərd torpağında dünyaya göz açan bu qəhrəman övlad, ömrünü doğulduğu yurda, Vətənə və xalqa xidmətə həsr edərək şərəfli və unudulmaz bir həyat yolu keçmişdir..
Şükür Həmidov 01 aprel 1975-ci ildə Qubadlı rayonunda anadan olmuş, uşaq yaşlarından vətənpərvər ruhda böyümüş, torpağa, bayrağa və milli dəyərlərə sonsuz sevgi ilə yetişmişdir. Bu torpağın havası, suyu, insanlarının mərdliyi onun xarakterinin formalaşmasında böyük rol oynamışdır.
Azərbaycan Silahlı Qüvvələrinin sıralarında xidmət etdiyi illərdə o, peşəkar zabit, qətiyyətli komandir və döyüş yoldaşlarının güvəndiyi lider kimi tanınmışdır. Döyüş meydanında göstərdiyi cəsarət, soyuqqanlılıq və vətənə bağlılıq onun adını qəhrəmanlıq salnaməsinə yazdırdı.
Vətən müharibəsi zamanı ön xətdə əsgərləri ilə çiyin-çiyinə döyüşən Şükür Həmidov, azadlıq uğrunda aparılan mübarizədə misilsiz şücaət göstərərək xalqın qəlbində əbədiyaşar bir iz qoydu. O, yalnız bir zabit deyil, həm də Vətənin hər qarış torpağını öz canından üstün tutan fədakar bir övlad idi.
Qubadlının azad olunması uğrunda aparılan döyüşlərdə onun göstərdiyi qəhrəmanlıq doğulduğu torpağa olan sədaqətinin ən böyük sübutu oldu. Bu gün azad Qubadlıda dalğalanan üçrəngli Azərbaycan bayrağı onun və silahdaşlarının qanı və canı bahasına ucaldılmış müqəddəs rəmzdir.
Bu gün, onun doğum günündə, biz yalnız bir qəhrəmanı xatırlamırıq – biz Qubadlının igid oğlunu, Azərbaycan ordusunun şərəfli zabitini, xalqın fəxrini və Vətənin əbədiyaşar müdafiəçisini yad edirik. Onun adı məktəblərdə, park və xiyabanlarda, abidələrdə və ən əsası isə xalqın qəlbində yaşayır.
Şükür Həmidovun həyat yolu gələcək nəsillərə bir örnəkdir – Vətəni sevməyin, torpağa sahib çıxmağın və lazım gəldikdə bu torpaq uğrunda canını fəda etməyin ən ali nümunəsidir.
Allah Milli Qəhrəmanımız Şükür Həmidova rəhmət eləsin. Onun əziz xatirəsi daim yaşayacaq, adı Azərbaycan tarixində qürurla çəkiləcək.
Qəhrəmanlar ölmür, Vətən bölünməzdir!
MUASİRMEDİA.AZ
