Sabirabadda canavarlar təsərrüfatlara hücum edir: 15-ə yaxın heyvana ziyan dəyib Sabirabad rayonunun Xəlfəli kəndində canavarların fərdi təsərrüfatlara hücumu qeydə alınıb. Hadisə kənd sakini Mənsur Seydiyevə məxsus təsərrüfatda baş verib. Sakinin sözlərinə görə, gecə saatlarında tövləyə daxil olan canavarlar 15-ə yaxın xırdabuynuzlu heyvana hücum edib. Nəticədə 5 qoyun tələf olub, digər heyvanlar isə müxtəlif dərəcəli xəsarətlər alıb. Tələf olmuş heyvanlar sahibi tərəfindən basdırılıb, yaralı qoyunlara isə profilaktik tədbirlər görülüb. Mənsur Seydiyev bildirir ki, bu, son bir həftə ərzində canavarların onun təsərrüfatına ikinci hücumudur. Onun sözlərinə görə, yırtıcıların hücumları təkcə onun təsərrüfatı ilə məhdudlaşmır, kənddəki digər sakinlər də oxşar problemlə üzləşirlər. Kənd sakinləri canavarların yaşayış məntəqələrinə yaxın ərazilərdə görünməsinin ciddi narahatlıq yaratdığını bildirərək aidiyyəti qurumlardan təhlükənin qarşısının alınması üçün müvafiq tədbirlərin görülməsini xahiş edirlər.
MUASİRMEDİA.AZ
YAQUB MEHDİ OÖLU
YAQUB MEHDİ OÖLU
