1918-ci il mayın 28-də Şərqdə ilk demokratik respublika olan Azərbaycan Xalq Cümhuriyyəti yaradıldı.
Müsəlman Şərqində ilk parlamentli respublika kimi tarixə düşən bu dövlət xalqımızın azadlıq, müstəqillik və milli dövlətçilik arzusunun gerçəkləşməsi idi. Azərbaycan Xalq Cümhuriyyətinin qurucuları sırasında Məmməd Əmin Rəsulzadə başda olmaqla, Fətəli xan Xoyski, Nəsib bəy Yusifbəyli, Əlimərdan bəy Topçubaşov, Həsən bəy Ağayev, Xəlil bəy Xasməmmədov, Səməd bəy Mehmandarov və digər görkəmli dövlət xadimləri yer alırdı. Onların fəaliyyəti Azərbaycanın müstəqil dövlət kimi formalaşmasında həlledici rol oynadı. Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti qısa müddətdə mühüm addımlar atdı. Dövlət bayrağı, ordu, parlament və milli idarəetmə sistemi formalaşdırıldı, qadınlara seçki hüququ verildi, Bakı Dövlət Universiteti yaradıldı. O dövr üçün böyük cəsarət sayılan bu qərarlar Azərbaycanın müasir dövlətçilik tarixinin əsasını qoydu. Lakin mürəkkəb beynəlxalq vəziyyət, bölgədəki siyasi qarşıdurmalar və bolşevik işğalı nəticəsində 1920-ci ilin aprelində Azərbaycan Xalq Cümhuriyyəti süquta uğradı. Azərbaycan uzun illər sovet hakimiyyəti altında yaşamağa məcbur oldu. Buna baxmayaraq, xalqın azadlıq ruhu heç vaxt sönmədi. 1991-ci ildə Azərbaycan yenidən dövlət müstəqilliyini bərpa etdi. Müstəqilliyin ilk illəri ölkə üçün olduqca ağır və mürəkkəb keçdi. Daxili siyasi qarşıdurmalar, iqtisadi böhran, Ermənistanın işğal siyasəti və ölkədəki qeyri-sabitlik Azərbaycanı ciddi təhlükələrlə üz-üzə qoymuşdu. Məhz belə bir dövrdə xalqın tələbi ilə hakimiyyətə qayıdan Ümummilli Lider Heydər Əliyev Azərbaycan dövlətçiliyinin xilasında mühüm rol oynadı. Onun rəhbərliyi dövründə ölkədə sabitlik təmin olundu, dövlət institutları möhkəmləndirildi, parçalanma təhlükəsinin qarşısı alındı və Azərbaycanın gələcək inkişafının əsası qoyuldu. Sonrakı mərhələdə dövlətçilik ənənələrinin möhkəmləndirilməsi, ordunun gücləndirilməsi və beynəlxalq arenada Azərbaycanın mövqeyinin güclənməsi ölkənin gələcəyini müəyyən edən əsas amillərə çevrildi. Prezident, Müzəffər Ali Baş Komandan İlham Əliyevin rəhbərliyi dövründə Azərbaycan həm siyasi, həm iqtisadi, həm də hərbi baxımdan daha da gücləndi. Müasir və peşəkar ordunun formalaşdırılması ölkənin ən mühüm prioritetlərindən birinə çevrildi. 2020-ci ildə Azərbaycan Ordusu 44 günlük Vətən müharibəsində tarixi qələbə qazandı. Müzəffər Ali Baş Komandan İlham Əliyevin rəhbərliyi ilə işğal altında olan torpaqların böyük hissəsi azad edildi, illərlə davam edən ədalətsizliyə son qoyuldu. Azərbaycan xalqı öz ərazi bütövlüyünü döyüş meydanında bərpa etdi. 2023-cü ildə keçirilən antiterror əməliyyatı isə ölkənin bütün ərazisində suverenliyin tam təmin olunması ilə nəticələndi. Xankəndi, Xocalı, Ağdərə və digər ərazilərdə Azərbaycan bayrağı ucaldıldı. Bununla da bir əsrdən artıq davam edən mürəkkəb və ağır mübarizə yeni tarixi mərhələyə qədəm qoydu. Bu gün 28 May yalnız keçmişin xatirəsi deyil. Bu tarix həm də Azərbaycanın müstəqillik yolunda keçdiyi çətin, lakin şərəfli yolun simvoludur. Azərbaycan Xalq Cümhuriyyətinin əsası qoyduğu ideyalar bu gün müstəqil və suveren Azərbaycanın timsalında yaşayır.
MUASİRMEDİA.AZ
GLLƏR AMİN
