Azərbaycanın qəhrəmanlıq salnaməsində öz igidliyi ilə əbədi iz qoymuş Baş leytenant Mətləb Quliyev 9 yanvar 1959-cu ildə Beyləqan rayonunda dünyaya göz açmışdır. Əslən Cəbrayıl rayonunun Süleymanlı kəndindən olan Mətləb hələ uşaq yaşlarından vətənə bağlılığı, cəsarəti və məsuliyyəti ilə seçilirdi.
O, ilk təhsilini Beyləqanda 3 saylı orta məktəbdə almış, daha sonra Cəmşid Naxçıvanski adına hərbi məktəbə daxil olaraq hərb sənətinə yiyələnmişdir. Hərbi məktəbi uğurla bitirdikdən sonra əmək fəaliyyətinə başlayaraq müxtəlif sahələrdə çalışmış, zəhmətkeşliyi və nizam-intizamı ilə seçilmişdir.
Hərbi xidmətini Ukraynada keçən Mətləb Quliyev sonradan Azərbaycan Pedaqoji İnstitutuna daxil olmuş, təhsil illərində yüksək göstəricilərinə görə “Təhsil əlaçısı” döş nişanı ilə təltif edilmişdir. 1985-ci ildə leytenant rütbəsi ilə təhsilini başa vuraraq Sumqayıt şəhərində 3 saylı məktəbdə hərbi hazırlıq müəllimi kimi fəaliyyətə başlamışdır. O, gənclərin vətənpərvərlik ruhunda yetişməsində böyük rol oynamışdır.
1992-ci ildən etibarən Daxili İşlər Nazirliyində xidmətə başlayan Mətləb Quliyevin həyatında ən çətin və şərəfli günlər başlayır. O, dəfələrlə cəbhə bölgəsinə gedərək Azərbaycanın ərazi bütövlüyü uğrunda igidliklə mübarizə aparırdı.
31 avqust 1992-ci ildə Ağdam uğrunda gedən ağır döyüşlərdə Mətləb Quliyev misilsiz qəhrəmanlıq göstərmişdir. Düşmənin möhkəmləndiyi yüksəkliklərə qarşı hücuma keçən igid zabit pulemyotla irəliləyərək çox sayda düşməni məhv etmişdir. Lakin mərmiləri tükəndiyi anda o, mühasirəyə alınmış, son nəfəsinə qədər döyüşərək qəhrəmancasına şəhid olmuşdur.
Onun bu misilsiz şücaəti yüksək qiymətləndirilmiş və Azərbaycan Respublikası Prezidentinin 6 noyabr 1992-ci il tarixli 290 saylı fərmanı ilə Mətləb Kamran oğlu Quliyev ölümündən sonra “Azərbaycanın Milli Qəhrəmanı” adına layiq görülmüşdür.
Qəhrəman zabit Bakı şəhərində yerləşən Şəhidlər xiyabanında dəfn edilmişdir. Bu gün onun adı və xatirəsi xalqımızın qəlbində yaşayır. Sumqayıt şəhərindəki 3 saylı məktəb onun adını daşıyır, məktəbin önündə büstü ucaldılmışdır. Yaşadığı binanın qarşısında xatirə lövhəsi yerləşdirilmiş, adına bulaq inşa edilmişdir.
Mətləb Quliyev – Vətən uğrunda canından keçən, adı tarixə qızıl hərflərlə yazılan əsl qəhrəman!
