Azərbaycan torpağının mərd, qeyrətli və Vətənə bağlı oğullarından biri olan şəhid gizir Emil İsgəndərov 1990-cı il avqustun 5-də Sumqayıt şəhərində dünyaya göz açmışdır. Uşaqlıq illərindən vətənpərvər ruhda böyüyən Emil daim torpağa, bayrağa və millətinə sevgi ilə yaşamışdır.
2008–2010-cu illərdə müddətli həqiqi hərbi xidmətini layiqincə yerinə yetirmiş, hərbi nizam-intizamı, məsuliyyəti və döyüş ruhu ilə seçilmişdir. 2011-ci ildən etibarən Azərbaycan Respublikasının Daxili İşlər Nazirliyinin Daxili Qoşunlarında müddətdən artıq həqiqi hərbi xidmət qulluqçusu kimi fəaliyyətə başlamış, Xüsusi Təyinatlı Dəstənin sıralarında şərəf və ləyaqətlə xidmət etmişdir. O, hər zaman silahdaşları arasında cəsarəti, döyüş hazırlığı və sarsılmaz iradəsi ilə seçilən nümunəvi hərbçi olmuşdur.
2020-ci il sentyabrın 27-də başlayan Vətən müharibəsi Emil İsgəndərov kimi igid oğulların qəhrəmanlıq salnaməsinə çevrildi. O, ilk gündən döyüşlərə qatılaraq ön cəbhədə düşmənə qarşı mərdliklə vuruşmuş, Cəbrayılın, Füzulinin və Şuşanın azadlığı uğrunda gedən ağır və taleyüklü döyüşlərdə böyük şücaət göstərmişdir.
Şuşa – Azərbaycan mədəniyyətinin beşiyi, qürur simvolu olan müqəddəs şəhərin azadlığı uğrunda gedən döyüşlərdə Emil İsgəndərov öz həyatını təhlükəyə ataraq döyüş tapşırıqlarını şərəflə yerinə yetirmişdir. O, 2020-ci ilin noyabr ayında Şuşa istiqamətində gedən döyüşlər zamanı son nəfəsinə qədər vuruşaraq qəhrəmancasına şəhidlik zirvəsinə ucalmışdır.
Onun həyatı Vətənə sonsuz sədaqətin, hərbi anda sadiqliyin, qorxmazlığın və əsl vətənpərvərliyin canlı nümunəsidir. Emil İsgəndərov yalnız bir əsgər deyil, o, xalqının qüruru, millətinin igid oğlu və gələcək nəsillərə örnək olan qəhrəmandır.
Bu gün onun adı Azərbaycan tarixində şərəf və qürurla çəkilir. Göstərdiyi igidlik, yazdığı qəhrəmanlıq salnaməsi heç zaman unudulmayacaq. Onun əziz xatirəsi xalqımızın qəlbində əbədi yaşayacaq, ruhu daim hörmət və ehtiramla yad ediləcəkdir.
QƏHRƏMANLAR ÖLMÜR – ONLAR VƏTƏNİN QƏLBİNDƏ YAŞAYIR!
VƏTƏN UĞRUNDA CANINDAN KEÇƏN UNUDULMAZ!
RUHUN ŞAD OLSUN, QƏHRƏMAN!
MUASİRMEDİA.AZ
