Hər il avqustun 1-i Azərbaycanda Azərbaycan Əlifbası və Azərbaycan Dili Günü kimi qeyd olunur.
Bu əlamətdar gün xalqımızın milli-mənəvi dəyərlərinin, ana dilimizin və zəngin yazı mədəniyyətimizin qorunması, inkişaf etdirilməsi və gələcək nəsillərə ötürülməsi baxımından xüsusi əhəmiyyət daşıyır. Bu gün Ümummilli Lider Heydər Əliyevin 2001-ci il 9 avqust tarixli Fərmanı ilə təsis edilib. Həmin Fərmanla ölkədə latın qrafikalı Azərbaycan əlifbasına keçid tam təmin olunub və avqustun 1-i Azərbaycan Əlifbası və Azərbaycan Dili Günü elan edilib. Bu qərar müstəqil Azərbaycanın milli-mədəni inkişafında mühüm mərhələ hesab olunur. Azərbaycan dili xalqımızın milli kimliyini, tarixini, mədəniyyətini və mənəvi irsini yaşadan ən qiymətli sərvətlərdən biridir. Əsrlər boyu zəngin ədəbi ənənələr formalaşdıran ana dilimiz bu gün də dövlət dili kimi ölkənin ictimai-siyasi, elmi və mədəni həyatında mühüm rol oynayır. Müasir dövrdə Azərbaycan dilinin saflığının qorunması, düzgün istifadəsi, gənc nəslin ana dilinə sevgi ruhunda tərbiyə olunması və rəqəmsal mühitdə dilimizin imkanlarının genişləndirilməsi dövlət siyasətinin əsas istiqamətlərindən biridir. Bu sahədə həyata keçirilən tədbirlər Azərbaycan dilinin beynəlxalq nüfuzunun artmasına da töhfə verir. Azərbaycan Əlifbası və Azərbaycan Dili Günü münasibətilə ölkənin müxtəlif elm, təhsil və mədəniyyət müəssisələrində konfranslar, sərgilər, ədəbi-bədii tədbirlər və maarifləndirici layihələr təşkil olunur. Bu tədbirlərin əsas məqsədi ana dilimizin zənginliyini təbliğ etmək, onun gələcək nəsillər tərəfindən qorunmasına və inkişafına töhfə verməkdir. 1 Avqust – Azərbaycan Əlifbası və Azərbaycan Dili Günü münasibətilə bütün Azərbaycan xalqını təbrik edir, ana dilimizin daim yaşamasını, inkişaf etməsini və gələcək nəsillərə olduğu kimi çatdırılmasını arzulayırıq.
MUASİRMEDİA.AZ
