AZƏRBAYCANLI Şamo Eyvazov qələbə qazandı-FOTO, VİDEO

İspanların böyük diqqətində olan Şamo Eyvazov rinqdə növbəti qələbəsini qazandı. İspaniyada yaşayan tanınmış azərbaycanlı idmançı, əslən Neftçala rayonunun Qaçaqkənd kəndindən olan Şamo Eyvazov rinqdə növbəti möhtəşəm qələbəsinə imza atıb. 33 yaşlı idmançımız İspaniyanın Torrelaveqa şəhərində keçirilən K1 idman növləri üzrə 67 kq çəki dərəcəsində keçirilən döyüşdə rəqibinə qalib gəlib. O, hər zaman olduğu kimi bu döyüşə də Azərbaycan bayrağı ilə çıxaraq vətəninə olan dərin bağlılığını nümayiş etdirib.Şamo Eyvazovun döyüşünü izləməyə gələn İspaniyada yaşayan soydaşlarımız da onu tək buraxmayıb, qələbə sevincini birlikdə yaşayıblar. Onun çıxışları yerli mətbuatda da geniş işıqlandırılır, ispaniyalı idmansevərlər tərəfindən böyük maraqla qarşılanır. 1992-ci ildə Neftçala rayonunun Qaçaqkənd kəndində anadan olan Şamo Eyvazov artıq 10 ildən çoxdur ailəsi ilə birlikdə İspaniyada yaşayır. O, 2018-ci ildə: MMA üzrə İspaniya çempionu (70 kq), K1 üzrə yarımqitə çempionu, Üçqat qaydasız döyüş üzrə İspaniya çempionu, İkiqat Avropa çempionu (K1) adını qazanıb. Hazırda o, İspaniyada fəaliyyət göstərən “Qarabağ İdman Klubu”nun təsisçisi və prezidentidir. Klubun nəzdində fəaliyyət göstərən 200-ə yaxın idmançı da yarışlara Azərbaycan bayrağı ilə çıxır. Şamo Eyvazov bu günə qədər 73 döyüş keçirib, bunların 70-də tam qələbə, 3-də isə heç-heçə qeydə alınıb. Uğurlu karyerası ilə yanaşı, onun şəxsi həyat hekayəsi də bir vətənpərvərlik nümunəsidir.Qeyd edək ki, o, 44 günlük Vətən müharibəsində Qubadlı uğrunda döyüşlərdə qəhrəmancasına şəhid olan Fərid Əsgərovun bibisi oğludur.