Müharibənin ağır mənzərəsində ümid yaradan xəbər: Rusiya və Ukrayna 540 nəfəri dəyişib.
Rusiya ilə Ukrayna arasında oktyabrın 23-də baş tutan əsir mübadiləsi müharibə fonunda diqqət çəkən hadisələrdən biri olub.
Tərəflər hər biri 270 nəfər olmaqla ümumilikdə 540 şəxsi dəyişiblər. Mübadilə həftənin əvvəlində ABŞ nümayəndələri ilə keçirilən danışıqlardan sonra baş tutub.
Ukrayna Prezidenti Volodimir Zelenski Ukraynaya qaytarılanlar arasında doqquz mülki şəxsin də olduğunu bildirib. Azad edilən hərbçilərin əksəriyyətinin 2022-ci ildə başlayan genişmiqyaslı müharibədən bəri əsir saxlanıldığı qeyd olunur.
Mübadilə nəticəsində azad edilənlər arasında 2022-ci ilin iyulunda Olenivka həbs düşərgəsində baş vermiş hücumdan sağ çıxan beş ukraynalının da olduğu bildirilir.
Rusiya tərəfi isə geri qaytarılan hərbçilərin Belarus ərazisində olduğunu, onların tibbi və psixoloji yardım aldıqdan sonra ölkələrinə aparılacağını açıqlayıb.
Əsir mübadiləsi müharibənin başa çatması demək deyil. Bununla belə, belə razılaşmalar ailələrinə qovuşmağı gözləyən insanlar üçün mühüm əhəmiyyət daşıyır və tərəflər arasında məhdud sahələrdə də olsa, razılaşma imkanlarının qaldığını göstərir.
Əsas məsələ humanitar proseslərin davamlı olması, əsirlərin hüquqlarına riayət edilməsi və münaqişənin sülh yolu ilə həlli üçün real imkanların genişləndirilməsidir.
MM.AZ
