Doğma yurda qayıdış davam edir: Xocavənd və Ağdərədə yeni həyat qurulur.
Oktyabrın 23-də Xocavənd və Ağdərə rayonlarına növbəti köç prosesi həyata keçirilib. Doğma torpaqlarına qayıdan ailələr uzun müddət müvəqqəti məskunlaşma şəraitində yaşadıqdan sonra yenidən öz yurdlarında məskunlaşmaq imkanı əldə ediblər.
Həmin mərhələdə ümumilikdə 42 ailə, yəni 163 nəfər Xocavənd və Ağdərə rayonlarına köçürülüb.
Onlardan 24 ailə Xocavənd şəhərində, 11 ailə Güneyxırman kəndində, 3 ailə Xocavənd kəndində, 2 ailə Hadrut qəsəbəsində, digər 2 ailə isə Ağdərə rayonunun Heyvalı kəndində yerləşdirilib.
Məlumata əsasən, köçürülən sakinlər əvvəllər ölkənin müxtəlif ərazilərində, əsasən yataqxanalarda, sanatoriyalarda və inzibati binalarda müvəqqəti məskunlaşmışdılar.
Doğma yurda qayıdış insanların yalnız yaşayış yerini dəyişməsi demək deyil. Bu proses ailələrin öz torpaqlarında yenidən məskunlaşması, sosial həyatın bərpası və ərazilərin dirçəldilməsi baxımından mühüm əhəmiyyət daşıyır.
Bununla yanaşı, dayanıqlı məskunlaşmanın təmin edilməsi üçün yaşayış evləri ilə yanaşı, məktəblərin, tibb müəssisələrinin, nəqliyyatın, kommunal xidmətlərin və məşğulluq imkanlarının inkişafı da vacibdir.
Xocavənd və Ağdərəyə köç prosesi azad edilmiş ərazilərdə həyatın bərpası istiqamətində görülən işlərin davamıdır.
MM.AZ
