SSRİ Jurnalistlər İttifaqının üzvü, Azərbaycanın Əməkdar jurnalist, Qırmızı Əmək Bayrağı ordenli, “Qızıl qələm” mükafatı laureatı Mahmud Mirdaməd oğlu Ağalarovun anadan olmasının 100 illiyi münasibətilə Salyan Rayon Tarix-Diyarşünaslıq Muzeyində “Yüz yaşlı qəzetin 100 yaşlı redaktoru” adlı tədbir keçirilmişdir. Salyan Rayon İcra Hakimiyyətinin dəstəyi ilə keçirilən tədbirdə RİH məsul nümayəndəsi, “Qələbə” qəzetinin kollektivi, veteran qələm sahibləri, yubilyarın doğmaları, yaxınları, rayon ictimaiyyətinin nümayəndələri, oxucular iştirak etmişlər. Tədbirdə Mahmud Ağalarovun, “Qələbə” qəzetinin dünyasını dəyişmiş əməkdaşlarının və ölkəmizin ərazi bütövlüyünün, suverenliyinin təmin olunmasında şəhid olmuş həmvətənlərimizin ruhu bir dəqiqəlik sükutla yad edilmiş, yubilyarın həyat və fəaliyyətini özündə əks etdirən foto-slayd nümayiş etdirilmişdir. “Qələbə” qəzetinin baş redaktoru Rüstəm Məlikov, Salyan Rayon İcra Hakimiyyəti başçısı aparatının humanitar və ictimai-siyasi məsələlər şöbəsi müdirinin müavini Məhərrəm Məmmədov, “Qələbə” qəzetinin sabiq baş redaktoru, Əməkdar müəllim Fərqanə Cəbrayılova, veteran jurnalist Rəhim Hüseynzadə, rayon ictimai ziyalılar birliyinin sədri, Əməkdar müəllim Allahverdi Piriyev, Azərbaycan Yazıçılar Birliyi Muğan Bölməsinin sədri Nəbi İbrahimov, Salyan Rayon Tarix-Diyarşünaslıq Muzeyinin direktoru Rəfiqə Ağabəyl, “Qələbə” qəzetinin əməkdaşları Leyla Nəsirova, Təyyar Nəsirli, Əzizağa Məmmədli, rayon ziyalıları Vaqif İslamov, Hüseyn Ağayev, şair Zabil Pərviz Mahmud Ağalarovu gözəl, səmimi, qayğıkeş insan kimi xarakterizə etmiş, onunla bağlı xatirələrindən söz açmışlar. Qeyd edilmişdir ki, mənalı ömrünün tam 50 ilini jurnalistikaya həsr etmiş Mahmud müəllim mənalı və ibratamiz bir həyat yaşamışdır. Onun haqqında isti xatirələr həmişə yaşayacaqdır. Yubilyarın qızı Bahar xanım atasının xatirəsinə göstərilən böyük hörmət və ehtirama görə tədbirin təşkilatçılarına və iştirakçılarına minnətdarlığını bildirmişdir.
MUASİRMEDİA.AZ
Yaqub Mehdioğlu. Salyan
