Cəlilabadda Paşatəpə qədim yaşayış məskənində tarixi tapıntılar üzə şıxıb-FOTO

Neolit dövrünə aid əmək alətləri, təsərrüfat küpləri, ibadət yerləri və silah anbarları. Cəlilabadda Paşatəpə qədim yaşayış məskənində aparılan arxeoloji qazıntılar zamanı ölkəmizin tarixi üçün maraqlı məlumatları üzə çıxarıb. Tapıntılar Azərbaycan ərazisində ilk əkinçi tayfaların həyat tərzini və mədəni inkişafını əks etdirir.Qədim əmək alətləri, təsərrüfat küpləri və ibadət yerləri… Bütün bunlar Cəlilabadın Cəfərxanlı kəndi ərazisində yerləşən Paşatəpə qədim yaşayış məskənində aparılan arxeoloji qazıntılar zamanı üzə çıxıb. Tapıntılar arasında unikallığı ilə seçilən nümunələr də var. Ərazidə dulusçuluq məmulatları ilə yanaşı, iri təsərrüfat küplərinin də tapılması burada uzun müddət oturaq həyat tərzi sürdüyünü göstərir. Bu il aşkar edilən və sayca ikinci hesab olunan mərmər əşya isə qədim tayfaların digər coğrafi bölgələrlə mübadilə əlaqələri qurduğunu sübut edir. Tarix elimləri doktoru Vəfa Mahmudova deyir ki, : “5 ədəd təsərrüfat quyusu aşkar edilib. Onlar arasında ən maraqlısı isə ərazidə yerləşən dini kult yeridir. Buranı erkən əkinçi tayfalarımız xüsusi zövqlə hazırlayıblar. Bu ilin ən möhtəşəm tapıntılarından biri isə mərmərdən hazırlanmış bu asmadır. Bu, Paşatəpə abidəsində qeydə alınan ikinci mərmər əşyadır.” Qədim yaşayış məskənində müxtəlif əmək alətləri ilə yanaşı, insan məzarları da aşkarlanıb. Artıq 4 ildir ki, mövsümi şəkildə davam edən qazıntılar nəticəsində tapılmış kömür və keramika nümunələrinin 7840 il yaşı olduğu laborator analizlərlə təsdiqlənib.