Azərbaycanın Milli Qəhrəmanı, igid komandir, vətənpərvər zabit Polkovnik-leytenant Şirin Mirzəyev Azərbaycan ordusunun formalaşmasında böyük xidmətləri olan qəhrəman şəhidlərimizdən biridir. O, 1947-ci il yanvarın 5-də Xankəndi şəhərində dünyaya göz açmış, əsli isə Şuşanın Mirzələr kəndindən olmuşdur. Uşaqlıq illərindən nizam-intizamı, cəsarəti və Vətən sevgisi ilə seçilən Şirin Mirzəyev həyatını xalqına və dövlətinə xidmətə həsr etmişdir.
Nizami adına beynəlmiləl orta məktəbi bitirdikdən sonra hərbi xidmətə başlayan Şirin Mirzəyev qısa müddətdə peşəkar hərbçi kimi tanınmışdır. Leninqrad Ali Siyasi Hərbi Məktəbində təhsil alaraq yüksək hazırlıq keçmiş, müxtəlif hərbi hissələrdə şərəflə xidmət etmişdir. Onun xidmət yolu yalnız hərbi peşəkarlıq deyil, həm də böyük iradə, xalqına bağlılıq və vətənə sonsuz sədaqət nümunəsi idi.
1991-ci ildə Qarabağ uğrunda döyüşlərin ən ağır günlərində Şirin Mirzəyev bütün rahatlığını və təhlükəsiz həyatını geridə qoyaraq Ağdama gəldi. O dövrdə Azərbaycanın peşəkar komandirlərə böyük ehtiyacı vardı və Şirin Mirzəyev bu məsuliyyəti şərəflə öz üzərinə götürdü. Min bir çətinliklə Azərbaycanın ilk nizami özünümüdafiə batalyonunu yaratdı. Bu addım gələcək Azərbaycan Ordusunun formalaşmasına böyük təkan verdi.
Onun rəhbərliyi altında yaradılan batalyon düşmənə qarşı mərdliklə döyüşür, torpaqlarımızın müdafiəsində qəhrəmanlıq göstərirdi. Şirin Mirzəyev həm Ağdam rayonunun hərbi komissarı, həm də alay komandiri kimi böyük məsuliyyət daşıyırdı. Döyüş yoldaşları onu cəsur, ədalətli və qorxmaz komandir kimi tanıyırdılar. O, daim ön cəbhədə olur, əsgərlərinə ruh verir, Vətən sevgisini onlara aşılayırdı.
1992-ci il iyunun 18-də Sırxavənd istiqamətində gedən ağır döyüşlər zamanı qəhrəman komandir minaya düşərək şəhid oldu. Onun şəhidliyi bütün Azərbaycan xalqını sarsıtsa da, adı daim qəlblərdə yaşadı. Şirin Mirzəyev ölümündən sonra 1994-cü ildə “Azərbaycanın Milli Qəhrəmanı” adına layiq görüldü.
Şirin Mirzəyev yalnız bir hərbçi deyil, xalqın qəlbində yaşayan qəhrəmanlıq rəmzi, Vətən sevgisinin canlı nümunəsi idi. Onun şərəfli ömür yolu Azərbaycan gənclərinə vətənpərvərlik, mərdlik və qəhrəmanlıq dərsi verir.
Ruhun şad olsun, Azərbaycanın igid oğlu, Milli Qəhrəman Şirin Mirzəyev!Sənin adın daim yaşayacaq, qəhrəmanlığın heç vaxt unudulmayacaq.
MUASİRMEDİA.AZ
MUASİRMEDİA.AZ
