Əliheydər İbiş oğlu Mustafabəyov, yəni “Şirvani” təxəllüsü ilə tanınan bolşevik Nəriman Nərimanovun siyasi çevrəsində olmuş və 1920–1921-ci illərdə onun şəxsi katibi və ən etibar etdiyi adamlardan biri hesab edilirdi. Özü 1917-ci ildən bolşevik partiyasına üzv olub.
Azərbaycanın 1920-ci ildə Sovet Rusiyası tərəfindən işğalından sonra Şirvani Azrevkomun fövqəladə komissarı kimi müxtəlif bölgələrdə fəaliyyət göstərib. Başqa sözlə, ilkin dövrlərdə Azərbaycanın müxtəlif bölgələrində işğal prosesinin birbaşa olaraq içində olub.Şirvaninin Nəriman Nərimanovla yaxınlığını sübut edən bir neçə fakt var. Məsələn, o, Nərimanovun 12 dekabr 1921-ci il tarixli sərəncamı ilə Azərbaycan SSR-in hökuməti yanında səlahiyyətli nümayəndəsi təyin edilmişdi. Bu vəzifə isə faktiki olaraq Azərbaycan hökumətinin Moskvadakı əsas nümayəndəliklərindən biri idi.1922-ci ilin avqustunda Azərbaycanda Xarici İşlər üzrə Katiblik yaradıldıqda da onun rəhbərliyinə Əliheydər Şirvani gətirilmişdi. Çünki 1921-də partiyadan çıxarılanda Nərimanov xarakteristika vermişdi ki, Şirvani Rəsulzadəni həbs edən adamdır. Yəni məhz bu əməlinə görə onu qabağa çəkmişdilər. Bundan sonra onu hətta yenidən partiyaya da bərpa etmişdilər.1927-ci ildə Tacikistan Vilayət Partiya Komitəsinin məsul katibi, daha sonra 1930-cu illərdə Mari Muxtar Vilayət Partiya Komitəsinin birinci katibi olub.Ancaq sonralar bu dəfə Rəsulzadəni həbs etməsi onu xilas etmir. 1935-ci ildə partiyadan çıxarılır və 1938-ci il 21 fevralda Moskvada həbs edilir.26 aprel 1938-ci ildə SSRİ Ali Məhkəməsinin Hərbi Kollegiyasının hökmü ilə Şirvani güllələnərək Moskvadakı Kommunarka xüsusi dəfn yerində basdırılır.
