1956-cı ildə Moskvada dünyaya gəlib, Bakıda böyüyüb. Kinoya ilk dəvəti hələ tələbəlik illərində almış Fərhad Yusifov bir sıra ekran əsərlərində – “Dədə Qorqud”, “Yarımçıq qalmış mahnı”, “Nizami” kimi filmlərdə müxtəlif obrazları canlandırıb. Xüsusilə “Tacikfilm”in istehsalı olan “Siyavuş haqqında dastan” filmində canlandırdığı obraz Rusiya və Tacikistanın kino həvəskarları arasında populyarlıq qazanıb. Bunu Rusiya mətbuatının tez – tez Fərhad Yusifovun yaradıcılığına müraciət etməsi, habelə kinosevərlərin azərbaycanlı aktyorla maraqlanmaları da sübut edir. Qeyd edim ki, rejissor Bension (Boris) Kimyagərovun ekran əsəri olmuş filmin bəstəkarı məşhur Azərbaycan musiqiçisi Arif Məlikovdur. Hazırda, Amerika qitəsində Mark Jozef adıyla yaşayan, aktyor, rejissor, ssenarist və prodüser 1989-cu ildə SSRİ – ni tərk edib. Kanadada tammetrajlı “Aldanış” filmi üçün ssenari yazan Fərhad Yusifov qrafik dizayn və videomontaj üzrə təhsil alıb. “RTVC” Telekanalında çalışmış aktyor – rejissor müəllif proqramları, habelə reklam çarxları hazırlayıb.
Anar Tağıyev
