POLKOVNİK-LEYTENANT MURAD MİRZƏYEV 31.03.1976 – 02.04.2016
Bəziləri ömürlərini yaşayır, bəziləri isə ömürlərini Vətənə həsr edərək əbədiyyət qazanırlar. Murad Mirzəyev məhz belə igid oğullardan idi.
Peşəkar xüsusi təyinatlı, məğrur Azərbaycan zabiti, qorxmaz komandir Murad Mirzəyev ömrünün hər anını Azərbaycanın müstəqilliyinə, torpaqlarımızın müdafiəsinə və əsgərlərinin yetişməsinə sərf etdi. ABŞ-ın “Ranger” kursunu uğurla bitirən, Türkiyədə yüzlərlə hərbçi arasında ən yüksək nəticəni göstərən, “Qılınc” mükafatına layiq görülən qəhrəman zabit daim ön sırada dayanmağı özü üçün şərəf bilirdi.
2016-cı ilin Aprel döyüşlərində Talış istiqamətində ən çətin tapşırıqları yerinə yetirərək, tabeliyində olan döyüşçülərlə birlikdə düşmənə sarsıdıcı zərbələr endirdi. Son nəfəsinə qədər döyüşərək müqəddəs şəhidlik zirvəsinə ucaldı.
Murad Mirzəyev yalnız bir hərbçi deyil, mərdliyin, qeyrətin, sədaqətin və Vətən sevgisinin canlı simvoludur. Onun adı Azərbaycan tarixinin qızıl səhifələrinə həkk olunmuşdur.
Rahat uyu, igid komandir! Sənin keçdiyin şərəf yolu gələcək nəsillər üçün əbədi qəhrəmanlıq məktəbi olacaq.
MM.AZ
