Azərbaycan xalqı noyabrın 9-da Dövlət Bayrağı Gününü qeyd edir. Bu əlamətdar gün ölkəmizin dövlətçilik tarixini, milli kimliyini, müstəqilliyini və suverenliyini özündə birləşdirən üçrəngli bayrağımıza ehtiramın ifadəsidir.
Azərbaycan Xalq Cümhuriyyətinin hökuməti 1918-ci il noyabrın 9-da üçrəngli bayrağın qəbul edilməsi haqqında qərar verib. Həmin bayraq müasir Azərbaycan Respublikasının dövlət bayrağının tarixi əsasını təşkil edir.
Üçrəngli bayrağımızdakı mavi rəng türkçülüyü, qırmızı rəng müasirliyi və inkişafı, yaşıl rəng isə islam mədəniyyətinə mənsubluğu ifadə edir. Aypara və səkkizguşəli ulduz da milli rəmzlərimizin ayrılmaz hissəsidir.
2009-cu il noyabrın 17-də Prezident İlham Əliyevin sərəncamı ilə noyabrın 9-u Dövlət Bayrağı Günü elan edilib.
Bu gün Azərbaycan bayrağı ölkəmizin şəhər və kəndlərində, dövlət qurumlarında, beynəlxalq tədbirlərdə və azad edilmiş ərazilərimizdə dalğalanır. Bayrağımız həm də xalqımızın birliyinin, mübarizəsinin və tarixi qələbəsinin simvoludur.
Bayraq sadəcə dövlət rəmzi deyil, xalqın tarixini, yaddaşını və gələcəyə inamını daşıyan müqəddəs dəyərdir.
